O sector do transporte por estrada de viaxeiros da provincia da Coruña continúa coas xornadas de folga e esta semana foron tres, o luns, o martes e a de hoxe. Folga que, se non hai un acordo antes, pasará a ser
indefinida a partir do día 2 de febreiro.

Neste senso, o pasado venres os sindicatos convocantes solicitaron unha mediación que, finalmente, despois dun rexeitamento inicial por parte da patronal que a condicionaba a poñerlle fin aos paros, terá lugar este luns na sede do Consello Galego de Relacións Laborais en Santiago. 

Lembrar que dende o sector reclámase un convenio digno, levan catro anos cun convenio paralizado coa
complicidade da Xunta, a pesar de que se está a falar dun servizo esencial básico e dun dos piares da mobilidade desta Comunidade.

Os traballadores e traballadoras do sector esixen, ademais dun incremento salarial que garanta o
seu poder adquisitivo, unha redución da xornada que permita unha conciliación real da vida profesional e
a persoal.

E, para garantir isto, ademais de reducir a xornada, demándase unha reordenación da mesma, que sexa coherente e que permita a demandada conciliación.

Tamén se pide unha actualización dos permisos retribuídos e días de  asuntos propios.

Outra das demandas que se establece de cara á negociación é a necesidade de acometer a xubilación parcial para o sector e que este sexa tratado como un servizo público. A mellora das condicións laborais é necesaria, como apunta Iván Cancela (FeSMC-UGT), para garantir o relevo xeneracional que xa esá aí e está a converterse nun gran problema poque se á xente moza non lle ofreces unhas condicións laborais
dignas non conseguirás atraela cara o sector.

Lembrar que, se non hai un acordo antes, a folga convertirase en indefinida a partir do día 2 de febreiro.