O pasado 31 de xullo asinouse o acordo económico do Convenio Colectivo do Transporte de Mercadorías por Estrada da provincia da Coruña, tras un proceso de negociación iniciado o 8 de
maio, coa constitución da mesa negociadora. O convenio terá vixencia durante todo o ano 2025, desde o 1 de xaneiro ata o 31 de decembro.

Desde FeSMC UGT Galicia valoramos positivamente este acordo, que permite ás persoas traballadoras do sector recuperar parte do poder adquisitivo perdido nos últimos anos e garante unha base de estabilidade laboral mentres se continúa avanzando na negociación do próximo convenio.

Principais melloras económicas

O convenio inclúe as seguintes melloras retributivas: 

• Incremento salarial do 4% en todos os conceptos desde a data de firma do acordo.
• Pago de atrasos con carácter retroactivo desde o 1 de xaneiro de 2025, exclusivamente sobre o salario base.
• Mellora nas pagas extraordinarias a partir do 1 de xaneiro de 2026, que pasarán a equivaler a un mes completo de salario base máis antigüidade, corrixindo a situación anterior na que non se abonaban cinco días.

Estas melloras permitirán ás persoas traballadoras do transporte encarar unha progresiva recuperación do seu poder adquisitivo, tendo en conta que nos últimos anos acumulouse unha perda superior ao 13% con respecto ao IPC.

Ambito de aplicación

O convenio será de aplicación a toda a provincia da Coruña e afecta a todas as empresas e o seu persoal laboral enmarcado nas seguintes actividades recollidas no Acordo Xeral Estatal para o Transporte de Mercadorías por Estrada: 

• Axencias de transporte
• Transporte de mercadorías
• Transporte de mobles e mudanzas
• Persoal de servizos auxiliares
• Empresas de mensaxería e paquetería 

Este novo texto substitúe ao anterior convenio colectivo, cuxa vixencia expirou o 31 de decembro de 2024. 

Compromiso cos dereitos LGTBI e a igualdade 

Desde FeSMC UGT Galicia seguimos defendendo que os convenios colectivos deben ir máis aló do aspecto económico. Por iso, nesta negociación puxemos sobre a mesa a inclusión dun Plan LGTBI, en cumprimento da Lei 4/2023, do 28 de febreiro, para a igualdade real e efectiva das persoas trans e a garantía dos dereitos das persoas LGTBI.

O noso sindicato considera imprescindible incorporar medidas efectivas para previr calquera tipo de discriminación e crear contornas laborais seguras, inclusivas e respectuosas coa diversidade. Este compromiso forma parte da nosa acción sindical diaria e é unha liña de traballo que seguiremos defendendo na mesa de negociación.

Unha negociación aberta que continúa 

A firma deste acordo económico non pecha o proceso. Desde FeSMC UGT Galicia acordamos manter aberta a mesa negociadora co obxectivo de abordar cuestións pendentes de especial relevancia, como a xornada laboral, a conciliación familiar, os permisos retribuídos, a formación e as licenzas.

De feito, a parte social e a empresarial emprazáronse a retomar as conversacións no mes de setembro, para seguir avanzando no novo convenio colectivo de 2026 antes de que finalice a vixencia do actual.

Desde FeSMC UGT Galicia seguiremos traballando con firmeza para que os dereitos das persoas traballadoras do transporte estean sempre protexidos, actualizados e adaptados ás novas realidades do sector. A nosa prioridade é construír convenios que recoñezan o valor do traballo, garantan condicións dignas e avancen en igualdade.