Do 28 de novembro ao 31 de decembro, as mulleres galegas traballan de balde
Por cada euro que gaña un home en Galicia, unha muller gaña 90,7 céntimos
Fecha: 29 Nov 2023
No conxunto da Unión Europea por cada euro que gaña un home, unha muller ingresa 87 céntimos. España a situación mellora, por cada euro que gaña un home a muller ingresa 91,1 céntimos, pero en Galicia a diferencia aumenta, xa que as mulleres ingresan 90,7 céntimos. É dicir na Unión Europea, a fenda é dun 12,7%, en España 8,9% e en Galicia dun 9,3%.
Por iso, a Comisión Europea celebrou este ano o 15 de novembro o Día da Igualdade Retributiva como un día simbólico para concienciar sobre o feito de que as traballadoras en Europa "traballan gratis" dende esa data ata finais de ano.
España súmase un ano máis a esta iniciativa en relación á brecha salarial que sofren as traballadoras españolas. No noso caso, celebramos este día o 29 de novembro xa que, de media, as mulleres españolas cobran un 8,9% menos que os homes en salario/hora, o que supón que as mulleres traballan gratis os 32,48 días ao ano. Non debemos esquecer que as mulleres galegas cobran un 9,3% menos que os homes, o que supón que traballan gratis 34 días ao ano (dende o 28 de novembro ata o 31 de decembro).
A reducción da brecha é consecuencia das medidas tomadas nos últimos anos
UGT destaca que o noso país ocupa o sétimo lugar da Europa dos 27 coas diferenzas salariais máis baixas debido ás políticas españolas en materia de igualdade retributiva entre mulleres e homes.
O sindicato lembra que medidas como as sucesivas subas do Salario Mínimo Interprofesional, que afectan especialmente ás mulleres, ou a obrigatoriedade dos Plans de Igualdade e dos rexistros salariais desagregados por sexo, destinados a detectar discriminacións, tamén provocaron unha redución da brecha salarial.
Directiva Europea de Igualdade Retributiva
No contexto europeo, o gran avance foi a aprobación da Directiva (UE) 2023/970 do Parlamento Europeo e do Consello, do 10 de maio de 2023, que reforza a aplicación do principio de igualdade salarial entre homes e mulleres para o mesmo posto de traballo ou traballo de igual valor mediante medidas de transparencia retributiva e mecanismos de cumprimento.
UGT confía en que esta directiva se traslade á normativa española antes de maio de 2026 xa que aumenta as obrigas das empresas europeas en materia de igualdade salarial entre mulleres e homes por traballo de igual valor.